14 декабрь Башҡортостан Башлығы Указы менән “Башҡорт теле көнө” тип иғлан ителде. Был көндө бөтә республикала башҡорт телен үҫтереүгә, киңерәк таратыуға һәм һаҡлауға йүнәлтелгән саралар үтәсәк.

  Әлбиттә, туған телебеҙгә арнал­ған саралар бер көн менән генә сикләнмәй, был байрамға әҙерлек мәктәбебеҙҙә күптән башланды. Китапханасы Г.Н.Аҡкөбәкова  башланғыс һәм 5 кластарҙа матур сара үткәрҙе, М.Аҡмулла хаҡында видеофильм ҡаранылар, һорауҙарға яуап бирҙеләр. Китапханала билдәле мәғрифәтсеһе М.Аҡмулланың тыуған көнөнә арналған мөйөш булдырылды. Башҡорт теле уҡытыусыһы Ә.И.Дүшәнбаева уҡыусыларҙы бөйөк мәғри­фәтсебеҙ Мифтахетдин Аҡмулланың тормош юлы, ижады менән таныштырҙы, 1 һәм 3 класс уҡыусыларын "Рухиәт" исемле мәктәп музейына экскурсияға алып барҙы. Музей етәксеһе И.Р.Дүшәнбаева уҡыусыларҙы башҡорт халҡының тормош-көнкүреше менән таныштырҙы.